Il-BĊE jaġġusta l-iskema tal-kapital

21 ta’ Diċembru 2023

• Aġġustament ta’ kull ħames snin ibbażat fuq il-popolazzjoni u data tal-PDG mill-Kummissjoni Ewropea
• 17-Il bank ċentrali nazzjonali se jkollhom sehem akbar fil-kapital tal-BĊE, disgħa se jkollhom sehem iżgħar, u wieħed se jżomm l-istess sehem
• L-ebda bidla fis-sistema ta’ drittijiet tal-vot rotanti

Il-Kunsill Governattiv tal-Bank Ċentrali Ewropew (BĊE) illum adotta atti legali dwar l-aġġustament regolari ta’ kull ħames snin tal-iskema tal-kapital tiegħu u l-kontribuzzjonijiet allokati lill-banek ċentrali nazzjonali (BĊNi). L-aħħar aġġustament għall-iskema tal-kapital tal-BĊE sar fl-1 ta’ Frar 2020 wara l-ħruġ tar-Renju Unit mill-Unjoni Ewropea u l-irtirar konsegwenti tal-Bank of England mis-Sistema Ewropea tal-Banek Ċentrali. L-iskema għas-sottoskrizzjoni tal-kapita tal-BĊE l-ġdida se tidħol fis-seħħ fl-1 ta’ Jannar 2024.

L-ishma tal-BĊNi fil-kapital tal-BĊE huma peżati skont is-sehem tal-Istati Membri rispettivi tagħhom fil-popolazzjoni totali u l-prodott domestiku gross (PDG) tal-Unjoni Ewropea, f'miżura ugwali.* Id-data rilevanti dwar il-popolazzjoni u l-PDG hija pprovduta mill-Kummissjoni Ewropea. Il-banek ċentrali nazzjonali jittrasferixxu ishma tal-kapital bejniethom safejn ikun meħtieġ biex jiġi żgurat li d-distribuzzjoni tal-ishma tikkorrispondi mal-iskema aġġustata.

Wara l-aġġustament, 17-il bank ċentrali se jkollu sehem fil-kapital tal-BĊE milli kellhom qabel u disgħa se jkollhom sehem iżgħar, filwaqt li għal bank ċentrali wieħed l-iskema tal-kapital imqarrba se tibqa’ l-istess. Id-distribuzzjoni ġdida tal-ishma tal-BĊN hija stabbilita fit-tabella ta’ hawn taħt. L-ammont totali tal-kapital sottoskritt tal-BĊE jibqa’ kif kien, EUR 10,825,007,069.61. Id-deċiżjonijiet rilevanti tal-Bank Ċentrali Ewropew jinsabu fuq is-sit web tal-BĊE u iżjed ’il quddiem se jiġu ppubblikati f’Il-Ġurnal Uffiċjali tal-Unjoni Ewropea.

Is-sistema li taħtha l-gvernaturi tal-BĊN jalternaw fiż-żamma tad-drittijiet tal-vot fuq il-Kunsill Governattiv tipprovdi li l-gvernaturi tal-BĊNi taż-żona tal-euro huma allokati f’żewġ gruppi skont id-daqs tas-settur finanzjarju u l-PDG tal-Istati Membri tagħhom, kif imsemmi hawn fuq. Din id-data għandha tiġi kkalkulata mill-ġdid kull meta jsir l-aġġustament tal-iskema tal-kapital ta’ kull ħames snin. Fuq il-bażi tal-kalkoli l-ġodda, l-allokazzjoni ta’ gvernaturi fi gruppi mill-1 ta' Jannar 2024 tibqa’ l-istess.

Tqassim tal-kapital tal-BĊE mill-1 ta’ Jannar 2024

(Iċ-ċifri jistgħu ma jaqblux minħabba t-tqarrib)

Għal mistoqsijiet min-naħa tal-media, jekk jogħġbok ikkuntattja lil William Lelieveldt, tel.: (+49 69 1344 7316).

Noti

• *Skont l-Artikolu 29.1 tal-Protokoll dwar l-Istatut tas-Sistema Ewropea ta’ Banek Ċentrali u tal-Bank Ċentrali Ewropew.