Il-BĊE jadotta skema tal-kapital ġdida

3 ta’ Diċembru 2018

• Aġġustament ta’ kull ħames snin ibbażat fuq il-popolazzjoni u dejta tal-PDG mill-Kummissjoni Ewropea
• 16-il bank ċentrali nazzjonali għandu jkollhom sehem ogħla, u 12 minnhom sehem anqas
• L-ebda bidla fis-sistema ta’ drittijiet tal-vot rotanti

Il-Kunsill Governattiv tal-Bank Ċentrali Ewropew (BĊE) adotta atti legali dwar l-aġġustament regolari kull ħames snin tal-iskema kapitali tiegħu u l-kontribuzzjonijiet imħallsa mill-banek ċentrali nazzjonali (BĊN) tal-Unjoni Ewropea. L-iskema l-ġdida għas-sottoskrizzjoni tal-kapital tal-BĊE tidħol fis-seħħ fl-1 ta’ Jannar 2019.

L-ishma tal-BĊNi fil-kapital tal-BĊE huma peżati skont is-sehem tal-Istati Membri rispettivi fil-popolazzjoni totali u l-prodott domestiku gross tal-Unjoni Ewropea (UE), f'miżura ugwali.*

L-ippeżar huwa bbażat fuq dejta pprovduta mill-Kummissjoni Ewropea. Il-banek ċentrali nazzjonali jittrasferixxu ishma tal-kapital bejniethom safejn ikun meħtieġ biex jiġi żgurat li d-distribuzzjoni tal-ishma tikkorrispondi mal-iskema aġġustata.

Wara l-aħħar reviżjoni, 16-il bank ċentrali se jkollhom sehem akbar fil-kapital tal-BĊE milli qabel u 12-il bank ċentrali se jkollhom sehem iżgħar. Id-distribuzzjoni ġdida tal-ishma tal-BĊN hija stabbilita fit-tabella ta’ hawn taħt. L-ammont totali tal-kapital sottoskritt tal-BĊE jibqa’ kif kien, EUR 10,825,007,069.61. Id-deċiżjonijiet rilevanti tal-Bank Ċentrali Ewropew jinsabu fil-websajt tal-BĊE u iżjed ’il quddiem se jiġu ppubblikati f’Il-Ġurnal Uffiċjali tal-Unjoni Ewropea. Il-Kunsill Ġenerali tal-BĊE kkontribwixxa għall-proċess tat-teħid tad-deċiżjonijiet, f'konformità mal-Istatut tas-SEBĊ.

Is-sistema li taħtha l-Gvernaturi tal-BĊN jalternaw fiż-żamma tad-drittijiet tal-vot fuq il-Kunsill Governattiv tipprovdi li l-Gvernaturi tal-BĊN taż-żona tal-euro huma allokati fi żewġ gruppi skont id-daqs tas-settur finanzjarju u l-prodott domestiku gross tal-Istati Membri tagħhom, kif imsemmi hawn fuq. Din id-dejta għandha tiġi kkalkulata mill-ġdid kull meta jsir l-aġġustament tal-iskema tal-kapital ta’ kull ħames snin. Fuq il-bażi tal-kalkoli l-ġodda, l-allokazzjoni ta’ Gvernaturi fi gruppi mill-1 ta' Jannar 2019 tibqa’ l-istess.

Tqassim tal-kapital tal-BĊE mill-1 ta’ Jannar 2019

Iċ-ċifri jistgħu ma jaqblux minħabba t-tqarrib.

Għal mistoqsijiet min-naħa tal-midja, jekk jogħġbok ikkuntattja lil Peter Ehrlich, tel.: +49 69 1344 8320.

Noti:

*L-Artikolu 29.1 tal-Protokol tal-Istatut tas-Sistema Ewropea tal-Banek Ċentrali u tal-Bank Ċentrali Ewropew jistabbilixxi kif tiġi ppeżata l-iskema kapitali.

Anness:

Paragun tal-iskema kapitali, l-iskema tal-Eurosistema u l-iskema ta’ allokazzjoni tal-karta tal-flus